नेपाल पुलिस क्लब जय ट्रफीकाे फाइनलमा प्रवेश, फाइनलमा आर्मीसँग भिड्ने

विभागीय टोली नेपाल पुलिस क्लबले लिग चरणको अन्तिम खेलमा बागमती प्रदेशलाई पराजित गर्दै पहिलो संस्करणको जय ट्रफी मेन्स एलिट कपको फाइनलमा स्थान बनाएको छ ।

एलिट कपको फाइनलमा स्थान बनाउने पुलिस दोस्रो टोली बनेको छ । यसअघि मधेश प्रदेशलाई पराजित गर्दै त्रिभुवन आर्मी क्लबले फाइनलमा स्थान पक्का गरिसकेको थियो । आइतवार सकिएको लिग चरणको अन्तिम खेलमा पुलिसले बागमती प्रदेशविरुद्ध ५ विकेटको जित हासिल गर्यो ।

बागमतीले दिएको १ सय १६ रनको लक्ष्य पुलिसले ५ विकेट गुमाएर पूरा गर्यो । पुलिसको जितमा शंकर रानाले सर्वाधिक ५६ रन जोडे । उनले ४५ बलमा ९ चौका प्रहार गरे । कप्तान कुशल भुर्तेल ३२ रनमा आउट हुँदा अर्जुन साउद २० रनमा अविजित रहे ।

बागमतीका लागि कप्तान सन्दीप लामिछानेले २ तथा नन्दन यादव, प्रतिस जिशी र सुर्य तामाङले समान १ विकेट लिए ।

पहिलो इनिङ्समा १ सय ३ रनको पछि परेको बागमतीले दोस्रो इनिङमा २ सय १८ रन जोडेको थियो ।

दोस्रो इनिङमा बागमतीले १ सय १५ रनको अग्रता लिएको थियो । बागमतीका लागि शुभ कसांकारले सर्वाधिक ७० रन जोडे । उनले ७४ बलमा १२ चौका र १ छक्का प्रहार गरे । इशान पाण्डे ५२, कप्तान सन्दीप लामिछाने र सुर्य तामाङ समान १६ तथा उत्तम थापा मगर १४ रनमा आउट भए ।

पुलिसका लागि ललितनारायण राजवंशीले ३, श्रवण यादवले २ तथा प्रेम तामाङ, कुशल भुर्तेल, राशिद खाना र गुलशन झाले समान १ विकेट लिए ।

त्यसअघि जनकपुरमा टस हारेर पहिले ब्याटिङको निम्ता पाएको बागमती ३३ ओभर २ बलमा १ सय १२ रनमा सबै विकेट गुमाउँदै समेटिन पुग्यो ।

बागमतीका लागि ओपनर इशान पाण्डेले सर्वाधिक ७१ रन जोडे । उनले ९४ बलमा १० चौका प्रहार गरे । पाण्डे ब्याटमा लागेर विकेट तर्फ जादै गरेको बल रोक्ने प्रयास गर्दा आउट भए । प्रतिक श्रेष्ठले १२ रन जोड्नु बाहेक बागमतीका अन्य ब्याटरले दोहोरो अङ्कमा रन जोड्न सकेनन् ।

पुलिसका लागि श्रवण यादवले ह्याट्रिक सहित ३ विकेट लिए ।

श्रवणले लिएको ह्याट्रिक प्रतियोगिताकै पहिलो हुन पुग्यो । उनले २७ औं ओभरमा प्रतिक श्रेष्ठ, सुर्य तामाङ र सन्दीप लामिछानेलाई आउट गराएका थिए । ललितनारायण राजवंशीले ३ तथा कुशल भुर्तेलले २ विकेट लिए ।

पुलिसले पहिलो इनिङ्समा ४५ ओभर ५ बलमा २ सय १५ रन जोडेको थियो । पुलिसका लागि अमितले सर्वाधिक ७९ रन जोडे । उनले ९७ बलमा १० चौका र २ छक्का प्रहार गरे । अमितले चौथो विकेटका लागि अर्जुनसँग मिलेर १ सय ४८ रनको शतकीय साझेदारी गरे ।

अर्जुनले ८२ बलमा ८ चौका र २ छक्काको सहयोगमा ७७ रन बनाए । गुलशन झाले १७ रन जोड्नु बाहेक अन्य ब्याटरले दोहोरो अङ्कमा रन बनाउन सकेनन् । बागमतीका लागि कप्तान सन्दीप लामिछानेले ४, नन्दन यादव र प्रतिस जिसीले समान २ तथा रिजन ढकालले १ विकेट लिए ।

२ मा जित र १ मा बराबरी सहित पुलिस ६६ अङ्कका साथ शीर्ष स्थानमा रहेर फाइनलमा स्थान बनाएको छ । भने, २ मा बराबरी र १ मा जितका साथ ५५ अङ्क जोडेको आर्मी दोस्रो स्थानमा रहेर फाइनलका लागि छनोट भएको छ ।

प्रतियोगिताको फाइनल खेल आगामी मङ्गलबार देखि हुनेछ । फाइनल खेल भने तीन दिवसीय हुनेछ ।